آج رات الاؤ کے گرد ۔۔۔ زمانہ جاہلیت کا ایک عجیب و غریب واقعہعلی إبن أبی طالبؓ…

آج رات الاؤ کے گرد ۔۔۔ زمانہ جاہلیت کا ایک عجیب و غریب واقعہ

علی إبن أبی طالبؓ سے جن لوگوں نے ڈائریکٹ علم سیکھا تھا ان میں سے ایک نام ۔۔۔ إِمام شعبیؒ کا بھی ہے ۔

إمام شعبیؒ حدیث کے معاملے میں اس قدر ٹیلنٹڈ انسان تھے ۔۔۔

کہ اسماء الرجال کی کتاب ’’السیر أعلام النبلاء‘‘ میں آپ بتاتے ہیں کہ پچھلے بیس سالوں میں ۔۔۔

میں نے کوئی حدیث ایسی نہیں سنی کہ جسے پہلے ۔۔۔ میں نے کبھی سنا نہ ہو ۔

اس قدر علم کی وجہ شاید آپ کے اساتذہ بھی تھے ۔۔۔

علی إبن أبی طالبؓ ، أبوہریرۃؓ ، أنس بن مالکؓ ، عائشہ صدیقہؓ ۔۔۔ اور انہی جیسے پینتالیس جلیل القدر صحابہ استاد ۔۔۔ اور بھی ۔

اب إمام شعبیؒ ایک شخص عمرو بن مالک کا واقعہ سناتے ہیں کہ جسے بعد میں ۔۔۔

إمام خرائطیؒ نے اپنی کتاب ’’الھواتف الجنان‘‘ میں محفوظ کر لیا تھا کہ جہاں سے میں اب آپ کو ۔۔۔ سنانے والا ہوں ۔

کہتے ہیں کہ عمرو بن مالک کی ایک ۔۔۔ بیٹی ہوا کرتی تھی کہ جسے ایک رات ۔۔۔

عمرو نے پانی لینے کے لیے ایک ۔۔۔ کنویں پر بھیجا کہ جس کے بعد دوبارہ پھر اس لڑکی کو ۔۔۔ کبھی کسی نے نہیں دیکھا ۔

عمرو کہتے ہیں کہ ہم نے اپنی لڑکی کی تلاش میں کوئی پہاڑ ، کوئی قبیلہ ، کوئی گھاٹی نہیں چھوڑی لیکن اس کا ہمیں دوبارہ ۔۔۔ کچھ پتہ نہیں چلا یہاں تک ۔۔۔

کہ ایک طویل عرصہ گزر گیا اور ہمارے دلوں میں اس بچی کی صرف ایک ۔۔۔ یاد ہی باقی رہ گئی لیکن ایک رات ۔۔۔

میں اپنے خیمے کے نیچے بیٹھا صحراء کی طرف دیکھ رہا تھا کہ دور سے ۔۔۔ مجھے ایک سایہ آتا دکھائی دیا ۔

اور جب وہ میرے قریب پہنچا تو میں نے دیکھا کہ یہ تو میری وہی بیٹی ہے ۔

اسے گلے سے لگا کر میں رونے لگ گیا لیکن بعد میں ۔۔۔ جب میری ہوش سنبھلی اور میں نے اسے غور سے دیکھا ۔۔۔ تو میں گھبرا گیا ۔

کیوں کہ اس کے عجیب لمبے ناخن ، جگہ جگہ سے گرے ہوئے بال اور جسم پر ایسے کہ جیسے گوشت نام کی کوئی شئے نہیں بچی ۔

کچھ دن گزرے ۔۔۔ اور اس کی صحت سنبھلنا شروع ہوئی تو ہم نے اس سے پوچھا ۔۔۔ کہ بیٹی تم کہاں چلی گئی تھی تو اس نے بتایا ۔۔۔

کہ جس رات آپ نے مجھے کنویں میں سے پانی لینے بھیجا تھا اس رات ۔۔۔

کالے رنگ اور لمبے قد کا ایک سایہ ۔۔۔ کنویں سے نکل کر مجھے اپنے ساتھ لے گیا تھا اور کہ جو ۔۔۔ کوئی انسان نہیں تھا ۔

ان تمام سالوں اس سائے نے مجھے اپنے پاس رکھا لیکن بخدا اس نے مجھ سے کبھی کوئی نازیبا حرکت نہیں کی لیکن ایک روز ۔۔۔

جنات کے کسی اور گروہ نے اس کے ساتھ گھمسان کی ایک لڑائی لڑی ۔

اور جس سائے کے پاس میں تھی اس نے منت مانی کہ اگر وہ جیت گیا ۔۔۔ تو مجھے میرے گھر واپس پہنچا دے گا ۔

عمرو کہتے ہیں کہ ہم کچھ یقینی اور کچھ بے یقینی میں اس کی یہ باتیں سنیں اور اس معاملے کو ہمیشہ کے لیے ۔۔۔

دفن کر دینے کا فیصلہ کیا یہاں تک ۔۔۔ کہ ہماری بیٹی تندرست ہو گئی اور ہم نے ایک جگہ اس کا ۔۔۔ نکاح کر دیا ۔

لیکن پھر ایک دن ۔۔۔ اس کی اپنے شوہر کے ساتھ زبردست لڑائی ہوئی کہ جسے سن کر ۔۔۔ آس پاس کے لوگ بھی اکٹھے ہو گئے ۔

اور لوگوں نے اس کے شوہر کو کہتے سنا کہ تو ہوا میں عجیب و غریب اشارے کرتی ہے !

تیری پرورش بھی جنات میں ہوئی تھی اور تو خود بھی ۔۔۔ ایک جننی ہی ہے ۔

تو اس لڑکی نے اچانک ہوا میں ۔۔۔ واقعی ایک عجیب اشارہ کیا اور سب لوگوں نے ایک گرجدار اور غصیلی آواز سنی کہ میں نے زمانہ جاہلیت میں بھی ۔۔۔

اپنے مرتبے اور مقام کی وجہ سے اس کی حفاظت کی تھی اور آج ۔۔۔

مسلمان ہونے کے بعد بھی میں اس کی حفاظت کروں گا اور اگر تو نے اسے نقصان پہنچانے کی کوشش کی ۔۔۔

تو خدا کی قسم کھڑے کھڑے میں یہیں تیری آنکھیں نوچ لوں گا ۔

عمرو کہتے ہیں کہ یہ آواز سن کر تمام لوگ خاموش ہو گئے یہاں تک ۔۔۔

کہ ایک بوڑھی عورت نے اونچی آواز میں پوچھا کہ تو ہمارے سامنے کیوں نہیں آتا ؟

تو اس نے جواب دیا کہ ہمارے جد نے جن چیزوں کا سوال کیا تھا ان میں سے ایک یہ تھی ۔۔۔

کہ ہم خود سب کو دیکھیں گے لیکن کوئی اور ۔۔۔ ہمیں دیکھ نہیں سکے گا ۔

تو اس بوڑھی نے دوبارہ پوچھا کہ ہماری ایک بیٹی ہے کہ جس کا بخار ۔۔۔ اترنے کا نام نہیں لیتا تو کیا تو اس کا کوئی علاج کر سکتا ہے ؟

تو عمرو کہتے ہیں کہ اس آواز نے وہ علاج بتایا بھی اور ہم نے ۔۔۔ اس لڑکی کو حیرت انگیز طور پر ٹھیک ہوتے دیکھا بھی ۔

آپ کو پتہ ہے کہ آج پوری دنیا میں ہر روز ۔۔۔ دو ہزار سے زیادہ لوگ ’’لاپتہ‘‘ ہوتے ہیں ۔

جن میں سے کچھ کا تو بالآخر پتہ چل جاتا ہے لیکن کچھ کا تو ۔۔۔

ساری زندگی دوبارہ کبھی پتہ نہیں چلتا ۔

نہ جانے ان میں سے کتنے لوگوں کو ایسا ہی کوئی سایہ ۔۔۔

ہمیشہ کے لیے اپنے ساتھ ۔۔۔ اپنی دنیا میں لے جاتا ہو گا ۔

آئی ونڈر

فرقان قریشی




Source from Furqan Qureshi Blogs Facebook Profile